يالهوى يا مستهوىعلى التابعين

موضوع: يالهوى يا مستهوى 2009-10-05, 04:05

هذا الباب لعلاج مجاريح الهوى ، وزي ماإنت عارف – عزيزي القارئ – الهوى مالوش دوا ، وقديما قالوا: الحب في القلب زي عضة الكلب ، هاتقولي إمال سعادتك فاتح ليه وجيّا تشتغلي إيه وطبعا مش هاقولك سواق ، وإنما هاقولك إسمع بقى على رأي مجد القاسم ، الواحد لما يقع في الحب يبقى جالو هوا يعني بقى مستهوي والمستهوي ربنا يشفي كل مريض عنده شوية برد نقوم نديلوه شوية دوا وربنا يشفي ، أما إذا كان البرد لا سمح الله من نوع أنفلونزا الطيور فهنا يبقى قول عليه يا رحمن يارحيم ويبقى فعلا يا لهوي يا مستهوي ، ولكن ما تقلقشي يا باشا أكتر من كده ويزيح ربنا ، أدام كتبت للعبد لله يبقى فيه أمل وممكن المهم تمشي على العلاج وعشان ما طولشي عليك نستعرض الرسالة التالية من المعذب و.م.ز من القاهرة.
جاري يا حمودة :
تبدأ قصتي بجيران جداد سكنوا بجوارنا بدل جارنا اللي عزل،وبسرعة وبإحساس الشباب العالي عرفت أوحسيت إن عندهم بنات ، قعدت يجي 15 يوم مش عايز أشوفهم مش عارف ليه كسوف ولا تكبر ولا مش عاجبني ! وجاءت الصدفة لما احتاجوا لخدمة معينه من والدتي اللي قالت لهم لما ابني يجي ولما جيت من الشغل بلغتني بطلبهم ورديت عليها اني لازم أشوفهم وأسمع منهم وطبعا دي كانت حجة عشان اشوفهم أو بمعنى أصح اشوفها طبيت من أول نظرة عجبوني قوي حلوين قوي وهوا كنت مخلص لهم طلبهم وتركت لهم نمرة موبايلي لحسن يعوزوا حاجة إمال دي بردو أصول الواجب والجدعنة ، وفي اليوم التالي رأيت رقم غريب بيرن عليا قلبي قلي دا حد منهم بس رسمت التقل برده وبعد اسبوع من الرنات رديت وقلت مين قالتلي أنا جارتك الجديدة قلت لها إنت صاحبة الشقة ولا أختها قالتلي أختها قلتلها أنا فعلا سبت رقم تلفوني مش عشان أختك عشانك إنت وكنت واثق إنك هاتكلميني وابتدا المشوار قصدي قصة الحب ، وبدأت أواعدها وتواعدني وأشوفها بره وتشوفني حبيتها حبيتها من كل قلبي وكنت باسألها بتحبيني وكانت بتقول أيوه قعدت أكتر من شهر غرقان في بحر الغرام ولكن جاءت المفاجئة الكبرى : اكتشفت الحقيقة عرفت كل عنها حاجة وخفت منها قوي ولكن حبها غلب اخوف ده عرفت إنها بتشرب سجاير بل ومدمنة على الحشيش ومصاحبة الكاس وبتشربه مع الناس شباب ورجالة والأدهى والأمر إني عرفت أنها بتعمل في فندق ليس فوق مستوى الشبهات طوال الليل حتى مطلع الفجر مش عارف أقولك إيه أنا عايز أخليها إنسانة كويسة أنا مازلت معها حتى الآن لا أستطيع أن أتركها وفي نفس الوقت لا أتصور أن تكون مثل هذه الإنسانة في يوم ما زوجتي أنا في حيرة وعذاب يا ريتني ما قابلتها يا ريتني ما حبيتها ، مع العلم بأن اليوم اللي يمر من غير ما أشوفها أو أكلمها هو يوم ضايع من حياتي ما بحسبوش من عمري وللأسف أصبحت أشرب لكي أنساها ويعدي عليا بالثلاثة أيام دون أكل أو نوم قلي أعمل إيه وإيه الحل ؟ ؟

وللمعذب و.م.ز من القاهرة أقول :

يا بني حرام عليك يابني إنت أكيد حد مسلطك عليا دا احنا لسه بنفتح الباب وبنقول يا هادي عايز تجيب ضرفها من أولها كدا دا إنت مش عندك أنفلونزا الطيور دا إنت عندك جنون البقر ياحبيبي ، عموما أنا كنت بضحّك معاك من أولها عشان ما تخدش الكلام على سدرك وتزعل مني وإنت سدرك مش ناقص أساسا ، وإذا دخلنا في الجد فاعرف يابني إنك إنت الغلطان منذ البداية لأنك عملت التطبيق النموذجي للمثل رحت أصطاد صادوني إنت مالك يسكن في الشقة اللي قدامك بنات ولا عفاريت زرق كنت خليك في حالك ومافيش أحسن من الإستقامة يابني ، سبت نمرة تليفونك فتحت على نفسك الباب وزعلان إنك تعبت وواعدت وخرجت وحبيت وانت عارف ان كل ده غلط وإنك بتخش البيت من شباكه مش من بابه ومع ذلك اتماديت فيه عموما ما علينا على رأي الست تفيد بإيه يا ندم وتعمل إيه يا عتاب ، بس برده يا أخي يظهر إن فيك شئ لله ربنا عرفك كل حاجة عنها وعرفت سلوكها البطال طيب مش تبعد بقى وربنا يهديك لأ قال جايز ربنا يهديها وتبقى ميه ميه والله ربنا قادر على كل شئ صحيح بس الهداية ليها شروط وأسباب وأولها إن الواحد يكون عايز ينهدي فعلا ويتوب إلى الله بجد ويقول ياريت اللي جرى ما كان مش يسكر طول الليل حتى مطلع الفجر ويقولك ربنا هايهديني إمال طبعا عارف أكيد إنه بيضحك على نفسه وهو أول واحد عارف كده بس الغرور وطول الأمل في الدنيا ما يعرفش إن خيبة الأمل راكبة جمل وممكن يخلص في ثانية ربنا يسترها ويتوب على الجميع ، أما انت بقى يا حبيب قلبي و.م.ز من القاهرة فانت لا معذب ولا حاجة لأنك إنت اللي معذب نفسك ربطت الحبل في مروحة السقف وشنقت نفسك ولما رقبتك انقطمت قلت ياه دي وجعاني حتى شوف الحبل حازز فيها إزاي؟! عموما اللي جوة المشكلة مش زي اللي برّاها واللي إيده في المية مش زي اللي إيده في النار كلام تمام ولكن يا عزيزي إنت طبيب نفسك ماحدش هاينفعك غير ربنا وإنك تبص لحالتك قبل ما تعرف البنت دي وبعدها وتقرر إنت عايز تكون فين يا إما ترجع وتعرف إنك بتنفخ في قربة مقطوعة يا إما الفاتحة على روحك من دلوقتي وختاما أقولك يا لهوي يا مستهوي.

هل اعجبك الموضوع اذا لا تردد فى نشرة بين اصدقائك حتى تعم الفائدة فلا خير فى كاتم علم

الموضوع الإصلي : يالهوى يا مستهوى المصدر : منتديات التابعين مع تحيات الكاتب: ملاك صعبه الامتلاك

موضوع: رد: يالهوى يا مستهوى 2009-11-30, 20:36

هههههههههههههههههههههههههههههههه
يخرب عقلك ياجوجو
ايه الكلام الجامد ده يابنتي
يالهوي يامستهوي
نايس بجد تسلم ايدك

هل اعجبك الموضوع اذا لا تردد فى نشرة بين اصدقائك حتى تعم الفائدة فلا خير فى كاتم علم

الموضوع الإصلي : يالهوى يا مستهوى المصدر : منتديات التابعين مع تحيات الكاتب: اسراء

موضوع: رد: يالهوى يا مستهوى 2009-12-01, 15:34

ويالهوى يا مشتهوى مين منورنى البت سوسو شخصيا منوره التوبيك يا قمر
هههههههههههههههههههههههههه

هل اعجبك الموضوع اذا لا تردد فى نشرة بين اصدقائك حتى تعم الفائدة فلا خير فى كاتم علم

الموضوع الإصلي : يالهوى يا مستهوى المصدر : منتديات التابعين مع تحيات الكاتب: ملاك صعبه الامتلاك