يا نجمة فـ ضيها بحلم و أعيش

وبحر حب من الحنان مابينتهيش

دورتيليك على تاج يليق ليك مالقيتلكيش

طب تقبليني تقبلي حبي؟

يكون تاج ليكي يا قلبي؟

وأزينهولك بشوقي المستخبي

وكل رمله شواطئ العريش

تقبلي ولا ماتقبليش؟

توجتك عـ الملايكة أميرة

وبحلم نبعد بعيد في جزيرة

وأنسى بيكي الهم و الحيرة

و نقول للحزن مايجيش

تقبلي ولا ماتقبليش؟

رسمتك غنوه فـ خيالي

وورده بيضا فـ قصر عالي

وأفديكي بروحي و آمالي

بس أوعديني ماتبعديش

تقبلي ولا ماتقبليش؟

ولو بعدتي يا روحي عني

مين فـ يوم يحس فني؟

و لمين غيرك هاغني؟

ده غيرك والله ماليش

تقبلي ولا ماتقبليش؟

بحلم يا ملكة نكون سوا

و أكون وزيريك في الهوا

و تكوني لجروحي الدوا

ولمين غيريك هاعيش؟

تقبلي ولا ماتقبليش؟

يا عيون مليانة بحب صافي

ياقلب بيوعد وبيوافي

خديني لحضنك الدافي

يروح الهم مايجيش

تقبلي ولا ماتقبليش؟

كتبت قصة هوانا على جبيني

هرب مني خوفي و أنيني

وزاد جوا قلبي حنيني

تيجي جنبي ماتبعديش

تقبلي ولا ماتقبليش؟

يا نسمة هادية فـ أنفاسك عبير

لعيونك أنا ولحبك أسير

قربيلي هاتي أديكي نطير

من غير جناحات ولا ريش

تقبلي ولا ماتقبليش؟

تفرح دموعي وياكي

وتقيد شموعي بهواكي

د أنا عمري والله فداكي

و حتى عمري مايقضيكيش

تقبلي ولا ماتقبليش؟

أعيش ليكي وأموت فـ عنيكي

و روحي ترفرف كده حواليكي

قربي ضميني مابين أديكي

غير حضنك مايدفينيش

تقبلي ولا ماتقبليش؟

ثانية فـ بعدك بتفوت سنة

و روحي تهرب مني أنا

و تروحلك و تعيش فـ هنا

و تقولك جنبك هاعيش

تقبلي ولا ماتقبليش؟

و أنا كل ده عاشق و دايب

يا كل عمري يا أغلى الحبايب

عندك أنتي روحي سايب

و حب الدنيا مايكفينيش

تقبلي ولا ماتقبليش؟

يا حبيبتي في نهاية كلامي

بهديكي أشواقي و غرامي

و كل فرحي و أبتسامي

وهيامي و حسي و كياني

تعالي جوا حضني ونامي

متفكريش ماتبعديش

تقبليني ولا ماتقبليش؟



منقووووووووووووووووول