يا مصر هانت
كلمات : تميم البرغوثي
لحن و عود و غناء : مصطفى سعيد

يا مصر هانت و بانت كلها كام يوم
نهارنا نادي و نهار الندل مش باين
الدوله ما فضلش فيها غير شوية شوم
لو مش مصدق تعالا عـ الميدان عاين
يا ناس مافيش حاكم إلا من خيال محكوم
واللي حـَ يقعد في بيته بعدها خاين
إللي حـَ يعقد كأنه سلم التانيين
للأمن بأديه و قاله همه ساكنين فين
وصلت لضرب الرصاص عـَ الخلق فـِ الميادين
حتى الجثث حجزوها اكمنهم خايفين
يا مصر أصبحنا أحيا و ميتين مساجين
فاللي حـَ يقعد في بيته يبقى مش مفهوم
واللي حـَ ينزل إلهي حارسه صاين
يا مصر هانت وبانت كلها كام يوم
نهارنا نادي ونهار الندل مش باين

نهارنا نادي و بأيدينا علي فكره
الصبح عنده فضول راح نعمل إية بكره
إيده علي الباب وخايف يلمس الأكره
ادخل يا أستاذ براحتك والبلد حره
إحنا زهقنا نشوف الصبح من بره
ادخل و خرج بقايا العتمه بالمره
الناس دي حره و جنود الأمن مضطره
يا صبح طلعت روحنا لجل تيجي يا خَي
طالعين نجبيها أهوه فى كل حاره وحي
حتى لو ضربونا بالرصاص الحي
شوف المداين كده مفروشه خلق وضي
دايما مفاجأة و دايما وقتها معلوم
الحكم لينا و ليكي الحق يامداين
يا مصر هانت و بانت كلها كام يوم
نهارنا نادي و نهار الندل مش باين

يا صف عسكر بدال الدرع شيلوا اتنين
خمسه و عشرين يناير يا شباب فاكرين
كان فـِ انجليز و وزير الداخليه تخين
كان عنده برضه عساكر زيكم جامدين
سابهم يموتوا علوله لم سأل فيهم
كانوا شبهكم أساميكم أساميهم
يا عسكري البهوات إللي بتحميهم
ممكن يردوا عليك لما تناديهم
يا عسكري أنا أصلي بس بستغرب
لو لاقي تأكل وتشرب قوم ياعم اضرب
اضرب عشان الوزير من ضربتك يطرب
لكن حـ تشتغل إية لما الوزير يهرب
أما الشديد القوي القادر أبو القادر
برميل تلامه و نشع علي مصر مـ الآخر
لو شافته معدده تكتب أدب ساخر
ثابت يقول للهرم يا كابتن اتاخر
و لم يزل معتقد إن الهرم حـَ يقوم
آدي الحجر والبشر قايمين يا سيد القوم
و الدين حـَ يترد يا اللي عشت متداين
يا مصر هانت و بانت كلها كام يوم
نهارنا نادي ونهار الندل مش باين

ده حكم أسرة و لا خوفو و لا خفرع
و لا وجع بطن يتعالج بزيت خروع
عمل مسوجر بعيد عنك و لا يطلع
جربنا فيه كل شىء مالقينا شىء ينفع
ما طلعش بالأدوية جربنا ألف طبيب
و لا بعطارة شيوخ ليهم بلح و زبيب
ولا بجحفل مغولي و ضرب بالقباقيب
عمل مسوجر و سفلي شغل تل أبيب
و شغل أمريكا متغلف و ختمه عليه
ضيف زارنا يا عم من غير دعوه لابس بيه
قعد تلاتين سنه ما بيقولش قاعد ليه
و النيه يديها لابنه النابغه بعديه
و يقول قضا و قدر بين البشر محتوم
قولنا له طيب و مين قال القدر معلوم
و ايش عرفك يا فخامتك بالذي كاين
يا مصر هانت وبانت كلها كام يوم
نهارنا نادي ونهار الندل مش باين