حنعيشه صح ؟؟؟
تخيل لو تعيش من غير هموم ، تخيل لو ترجع بيك الدنيا وما تعملش أي غلطة انت ندمان عليها ، تخيلي لو حياتك من غير مشاكل ، لو تعيشي من غير تناقضات ، لو نحس كلنا بالراحة من غير قبضة الصدر .
تخيل لو الحياة ده ممكن تعيشها بس عليك إنك تفكر صح ، ممكن الجنة تبقى في دنيتنا بس ندفع ثمنها ، مين مننا ما نفسوش في الحياة الحلوة ده ، مين مننا مانفسوش يعيشها صح .
الفرصة قدامكم ، وربنا بيدعوكم للحياة الصح ، والمنادي بينادي : يلا تعالوا ، تفرط في الكنز ده ليه ، وتفكر تسيب راحتك ليه ؟ تعالوا نعيشها صح
في الساحل اتقابل ( خالد ) مع ( ميدو ) ودار بينهم الحوار ده :
خالد : يااااه هو رمضان هييجى علينا و احنا فى الساحل؟
ميدو :ايه المشكلة ؟ ده هيكون جامد آخر حاجة
خالد : جامد!! جامد إزاى ده شيشة و بنات و ........... و صيام و تراويح طب ازاى؟!
ميدو : عادى هنقضيها ....... نايم فى السرير ، وعاوز اليوم يطير ، علشان الليل يطول ، و أقلب على السحور ، فى خيمة على البحور
خالد : لأ مش عادى أنا نفسى أتغير السنة ده ، نفسي أعيش رمضان جديد ،و أنا ليه دايما عن ربنا بعيد
ميدو : عن ربنا بعيد ؟! يا عم دماغك ... متيجي نفكر هنعمل إيه في العيد ، ونعيش في عالم جديد و الراحة اللي تخليك سعيد
خالد : سعيد! ده أنا نفسى أعيش مرتاح نفسى أحس بالآمان نفسى فى براءة أيام زمان
ميدو : زمان ؟! و أمان ؟!
خالد : عارف لما الواحد يكون عاوز يحس بالآمان ، و يسجد سجدة للرحمن ، و يكون غير زمان ، و يقعد يبقى كمان و كمان ساعتها بس الواحد هيحس إنه انسان
انت مين فيهم ؟
انت عايز ربنا ولا مش في دماغك ؟ انت عايز الجنة ولا مش على بالك ؟ انت عارف إن ربنا يبسط يده لك ، أيوه ربنا بيتودد ليك علشان تطيعه ، ممكن تفكر ترده ؟؟؟ لو ربنا بيحبك ممكن تحب إنت غيره ؟؟ ممكن مزاجك يبقى أهم من ربنا ؟
تتصور لو ربنا مديك هدية ، وسمحلك بفرصة علشان ترجعله ممكن ترفض الهدية ده ، مش لو رفضتها تتوقع إن الرد حيكون صعب هو ده اللي قالوا النبي صلى الله عليه وسلم عن رمضان : قال : " من أدرك رمضان فلم يُغْفَرْ له دخل النار فأبعده الله وأسحقه " [ رواه الطبراني ]
تتصور اللي مش حيتغفرله في رمضان ، اللي مش حيركز في رمضان ، اللي مش حيبطل المعاصي في رمضان ، اللي لسه ناوي كمان يقضيها زي ما تيجي في رمضان ، اللي ناوي يفطر في رمضان ، اللي ناوي يكمل مصيف في رمضان ، اللي مش حيبطل مواقع إباحية ، اللي مكمل حياة ضياع ، النبي صلى الله عليه وسلم توعده بالنار ، ومش بس كده لأ ده حيعيش في الدنيا محروم مُبعد ، وفي الآخرة سيسحق ، تخيلوا " سحق " ربنا يعافينا .
وفي المقابل عندك شاب(ة) ستخرج من رمضان وربنا محا كل سيئاته ، وغفرله كل معاصيه ، وأعتق رقبته من النار ، " فَمَنْ زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ " [آل عمران : 185] خلاص نجح في اختبار الدنيا ، ونجح مع ربنا ، وهو ده التميز الحقيقي ، وهي ده السعادة الغالية .........تختار تكون مين فيهم ؟؟؟
خد قرارك :
لله اللي نعمه مغرقاك : كفاية لحد كده بُعد عن ربنا .
للنبي صلى الله عليه وسلم : اللي حنكسف لما نقف قدامه وإحنا من أمته وهو بيقول : " لا تسودوا وجهي " ممكن تسود وش النبي بذنوبك ... ترضى تكون كده ؟
للجنة اللي ربنا أعداهاك بيده بتقولك : ما تخسرنيش .
ممكن لله :
يكون قرارك ، لا للمعاصي في رمضان ، كفاية اللي الواحد بيعمله طول السنة ، فعلشان ربنا ما يغضبش عليَّ في الشهر الكريم ده ، أنا قررت أتغير .
ممكن معايا تقول : والله ما انا فاطر أي يوم في رمضان السنة دي ، والله ما أنا قاعد في المصيف أكتر من كده ، والله ما داخل مواقع بعد كده تخلي ربنا يغضب عليَّ ، والله ما أنا متابع أي مسلسلة لا مصري ولا تركي ، يا عم ده هو رمضان واحد في السنة ، أنا لحد كده استكفيت ، مش حاضيع الفرصة ده المرة ده ، أنا لازم أفوق لنفسي ، ده جنة ونار مش لعبة .
يلا تعالى نعيشه صح ؟
حنصوم صح وربنا سيغفر لنا كلنا إن شاء الله قال رسول الله صلى الله عليه وسلم " من صام رمضان إيمانا و احتسابا غفر له ما تقدم من ذنبه " [ متفق عليه ]
حنفطر كل يوم اللي نقدر عليه : قال رسول الله صلى الله عليه وسلم "من فطر صائما كان له مثل أجره غير أنه لا ينقص من أجر الصائم شيئا " [رواه الترمذى و صححه ]
كل ليلة حنصلي التراويح : قال صلى الله عليه وسلم " من قام رمضان إيمانا و احتسابا غفر له ما تقدم من ذنبه " [ متفق عليه ]
وفي العشر الأواخر سنجتهد علشان نبلغ ليلة القدر : قال صلى الله عليه وسلم " من قام ليلة القدر إيمانا و احتسابا غفر له ما تقدم من ذنبه " [ متفق عليه ]
لساني مش حيبطل استغفار وصلاة على النبي صلى الله عليه وسلم واللي حيجي على لساني ، أنا عايز أعيش بقى : قال رسول الله صلى الله عليه و سلم : " مثل الذى يذكر ربه و الذى لا يذكر ربه مثل الحى و الميت" [ رواه البخارى ]
آن الأوان يا رب
راجعلك يا سيدي ما تردنيش ، راجعلك ودمعتي على خدي من كثرة ذنوبي فافتحلي بابك ، راجعلك وأنا مكسوف وندمان فاقبلني عندك بكرمك وجودك ، يا من هو أرحم عليَّ من أمي وأبي خذي بيدي ، يارب مليش غيرك ، فاغفر وارحم ، واعفُ عني وتكرم .
يلا نخليها صفحة جديدة مع ربنا ...

نايس توبيك يا سيكو بجد تحفه
بس يا رب تعمل بيه كلنا